Լուրեր

2018 Սեպ 12, Չորեքշաբթի 20:00

Սեպտեմբերի 12-ին Միլանում համերգային ծրագրով հանդես եկավ «Նարեկացի» ժողովրդական գործիքների նվագախումբը կոմպոզիտոր, թառահար Արտեմ Խաչատուրի գեղարվեստական ղեկավարմամբ:

Նվագախումբը գեղեցիկ հնարավորություն ընձեռեց ներկաներին վայելելու հայկական ժողովրդական անզուգական մեղեդիներ:

- Աստծո կամոք այսօր այստեղ ենք... Մեզ համար շատ խորհրդանշական է ձեզ համար հանդես գալը: Ուրախ ենք՝ հայկական մշակույթը տարածելու մեր կարողության համար: Մեզ հետ հայրենիքից բերել ենք նվեր՝ «Նարեկացի» արվեստի միության պատկերանշանով փոքրիկ նուռ։

Նվերը պատկանում է հայր Թովմա Խաչատրյանին, ով օգնեց, որ այսօրվա համերգը կայանա: Դուք այն մարդկանցից եք, ովքեր հայկական մշակույթը տարածելու հարցում մեծ գործունեություն են իրականացնում,- նշեց «Նարեկացի» արվեստի միության հիմնադիր Նարեկ Հարությունյանը:

Հայր Թովմա Խաչատրյանը ողջունեց բոլորին և հայտնեց իր հիացմունքը Նարեկ Հարությունյանի կատարած հայանվեր գործի, Արտեմ Խաչատուրի գործիքավորումների և երաժիշտների պրոֆեսիոնալիզմի վերաբերյալ:

- Համայնքում ընդհանուր խանդավառություն է տիրում, և չեմ հիշում, որ երբևէ այսքան կարևոր համերգ տեղի ունեցած լիներ... Շնորհակալություն երիտասարդներին իրենց արհեստավարժ կատարումների համար, Նարեկ Հարությունյանին կատարած հայանվեր գործի և Արտեմ Խաչատուրին բարձր որակի գործիքավորումների, մատուցման ու նվագախմբի աշխատանքների կազմակերպման համար,- իր խոսքում ընդգծեց հայր Թովմա Խաչատրյանը:

Սա նվագախմբի մեծ համերգային շրջագայության չորրորդ կանգառն էր. համերգները կշարունակվեն Ֆրանսիայում, Շվեյցարիայում:

Նշենք, որ նվագախումը համերգային ծրագրով արդեն հասցրել է հանդես գալ նաև Հռոմում, Տրիկազեում և Ստամբուլում: